கல்முனையில் கடற்படையும் மதுவரித் திணைக்களமும் இணைந்த விசேட நடவடிக்கை- 6 கிலோ மூக்குத்தூளுடன் சந்தேகநபர் கைது

94 சிறிய பொதிகளில் அடைக்கப்பட்ட சட்டவிரோதப் போதைப்பொருள் பறிமுதல்
கல்முனைக்குடி பகுதியைச் சேர்ந்த 61 வயதுடைய நபர் சிக்கினார்- மேலதிக விசாரணைக்கு மதுவரி அலுவலகத்தில் ஒப்படைப்பு

பாறுக் ஷிஹான்

இலங்கை கடற்படையினரும் கல்முனை மதுவரித் திணைக்கள அலுவலகமும் இணைந்து மேற்கொண்ட விசேட கூட்டுச் சோதனை நடவடிக்கையின்போது, சட்டவிரோதமாக உடைமையில் வைத்திருந்த கஞ்சா மற்றும் புகையிலைக் கலவையினால் தயாரிக்கப்பட்டதாகச் சந்தேகிக்கப்படும் ‘மூக்குத்தூள்’ போதைப்பொருளுடன் சந்தேகநபர் ஒருவர் கைது செய்யப்பட்டுள்ளார்.

இச் சோதனை நடவடிக்கை கடந்த செவ்வாய்க்கிழமை (03) கல்முனைக்குடி பகுதியில் வெற்றிகரமாக முன்னெடுக்கப்பட்டது.

தென்கிழக்கு கடற்படைக் கட்டளையின் கீழ் இயங்கும் இலங்கை கடற்படைக் கப்பலான ‘தீகாயு’  கிடைத்த இரகசியத் தகவலின் அடிப்படையில் இக் கூட்டு நடவடிக்கை திட்டமிடப்பட்டது.

இதன்போது கல்முனைக்குடி பகுதியில் சந்தேகத்திற்கிடமான முறையில் நடமாடிய நபர் ஒருவரைச் சோதனையிட்டபோது, அவரிடமிருந்து சட்டவிரோத விற்பனைக்காகப் பொதி செய்யப்பட்டிருந்த 6 கிலோகிராமிற்கும் அதிகமான எடை கொண்ட 94 சிறிய மூக்குத்தூள் பொதிகள் மீட்கப்பட்டன.

கைது செய்யப்பட்ட சந்தேகநபர் கல்முனைக்குடி பகுதியைச் சேர்ந்த 61 வயதுடையவர் என அடையாளம் காணப்பட்டுள்ளார்.கைப்பற்றப்பட்ட போதைப்பொருள் தொகையுடனும், கைது செய்யப்பட்ட சந்தேகநபருடனும் மேலதிக சட்டபூர்வ நடவடிக்கைகளுக்காகக் கல்முனை மதுவரித் திணைக்கள அலுவலகத்திடம் கடற்படையினரால் ஒப்படைக்கப்பட்டுள்ளனர்.