-கிலசன்-
மட்டக்களப்பு மாவட்ட விவசாயத் துறையில் ஒரு முக்கிய மைல்கல்லாக, மாவட்ட வரலாற்றிலேயே முதன்முறையாக 1000 மண் மாதிரிகளைப் பரிசோதிக்கும் பிரம்மாண்ட “மண் பரிசோதனை விழிப்புணர்வுத் திட்டம்” சிறப்பாக முன்னெடுக்கப்பட்டு வருகின்றது.
மட்டக்களப்பு மாவட்ட விவசாயப் பணிப்பாளர் திரு. M. பரமேஸ்வரன் அவர்களின் வழிகாட்டலில் இத்திட்டம் ஆரம்பிக்கப்பட்டு இயங்கி வருகிறது. மட்டக்களப்பு விவசாயத் திணைக்களம் (விரிவாக்கம்) மற்றும் தேசிய அடிப்படைக் கற்களுக்கான நிறுவனம் (NIFS – National Institute of Fundamental Studies) ஆகியன இணைந்து இக்கூட்டு நடவடிக்கையை மிகச் சிறப்பாக ஒழுங்குசெய்துள்ளன.
இத்திட்டத்தின் முதற்கட்ட மண் பரிசோதனை மற்றும் விழிப்புணர்வு நிகழ்வானது மண்டபத்தடியில் உள்ள உதவி விவசாயப் பணிப்பாளர் பணிமனையில் நடைபெற்றது. இந்நிகழ்வின் போது விவசாயிகளிடமிருந்து 60 மண் மாதிரிகள் சேகரிக்கப்பட்டு, உடனுக்குடன் பரிசோதனைக்கு உட்படுத்தப்பட்டன. பரிசோதனை முடிவுகளின் அடிப்படையில், நிலத்தின் வளத் தன்மைக்கேற்ப இடப்பட வேண்டிய உரங்கள் மற்றும் மண் வளத்தை மேம்படுத்துவதற்கான பொருத்தமான பரிகாரப் பரிந்துரைகளும் விவசாயிகளுக்கு நேரடியாக வழங்கப்பட்டன.
மண்ணின் தன்மையைச் சரியாக அறிந்து கொண்டு, அதற்குப் பொருத்தமான உரங்களைப் பயன்படுத்துவதன் மூலம் தேவையற்ற உற்பத்திச் செலவைக் குறைத்து அதிக விளைச்சலைப் பெற இத்திட்டம் பெரிதும் உதவுகிறது. இத்தகைய பயனுள்ள விழிப்புணர்வு முயற்சியை முன்னெடுத்த பிரதி விவசாயப் பணிப்பாளர்
திரு. M. பரமேஸ்வரன் அவர்களுக்கும், விவசாயத் திணைக்கள அதிகாரிகள் மற்றும் NIFS நிறுவனத்திற்கும் பிரதேச விவசாயிகள் தங்களது மனமார்ந்த நன்றிகளைத் தெரிவித்துக் கொண்டனர்.
மட்டக்களப்பு மாவட்டத்தைச் சேர்ந்த ஏனைய விவசாயிகளும் இச்சேவையைப் பயன்படுத்தித் தங்களது விவசாய நிலங்களின் மண் பரிசோதனைகளை மேற்கொள்வதற்காக, தங்கள் பகுதிக்குரிய பிரதேச விவசாய போதனாசிரியரை (Agricultural Instructor) உடனடியாகத் தொடர்பு கொண்டு பயன்பெறுமாறு கேட்டுக்கொள்ளப்படுகிறார்கள்.
