தமிழ் சமூக வளர்ச்சியில் தன்னை அர்ப்பணித்த மகா சக்தியின் முன்னாள் உபதலைவர் மூத்தான் இலட்சுமணன் அவர்களின் இழப்பு பேரிழப்பாகும் -சோ. புஸ்பராஜா இரங்கல் செய்தி
தமிழ் சமூகத்தின் மேம்பாட்டுக்கு தன்னை அர்ப்பணித்து ஜனநாயக வழியில் ஆரவாரம் இன்றி செயற்பட்ட ஆலையடிவேம்பு மட்டுப்படுத்தப்பட்ட மகாசக்தி சி.க.கூ சங்கத்தின் முன்னாள் இயக்குநர் சபை உறுப்பினர் மூ.இலட்சுமணன் அவர்கள் இன்று இறையடி சேர்ந்த செய்தி அதிர்ச்சியளிக்கிறது என முன்னாள் கிழக்கு மாகாணசபை உறுப்பினரும் சங்கு சின்ன வேட்ப்பாளருமான சோ. புஸ்பராசா தனது இரங்கல் செய்தியில் குறிப்பிட்டுள்ளார்.
அவர் மேலும் தெரிவிக்கையில்,
அமரத்துவமடைந்த மூ. இலட்சுமணன் அவர்களது இழப்பு அம்பாறை மாவட்ட தமிழ் மக்களுக்கு மாத்திரமின்றி இலங்கை வாழ் தமிழ் மக்களுக்கே பேரிழப்பாகும்.
தனது சிந்தனை செயற்பாடுகள் இறக்கும்வரை தமிழ் மக்களின் நலன் சார்ந்ததாகவே இருந்துள்ளது. எனக்கு பல வழிகளில் ஆலோசனை வழங்கும் என் அன்புக்குரியவராவார். சில தினங்களுக்கு முன்பும் தொலைபேசியில் வாழ்த்துக்களையும் பகிர்ந்து கொண்டிருந்தார்.
மகா சக்தி எனும் மக்கள் நலன் பேணும் அமைப்புக்கு ஆரம்பகால உறுப்பினராகவும், இயக்குனர் சபை உபதலைவராகவும் இருந்து வழி நடத்தியுள்ளார். அன்னாரின் ஆத்மா இறையடியில் சாந்தி பெற இறைவனை பிரார்த்திக்கின்றேன். என அவரது இரங்கல் செய்தியில் குறிப்பிட்டுள்ளார்.
