கிழக்கு தமிழ் மக்கள் எப்போதும் தமிழ் தேசியத்தின் மீதும், உரிமை சார்ந்த விடயங்களுடனும் ஒன்றர கலந்துள்ளனர் என்பதைதே இத்தேர்தல் முடிவுகள் கூறுகின்றது -கோடிஸ்வரன் எம்.பி

வி.சுகிர்தகுமார்

கிழக்கு தமிழ் மக்கள் எப்போதும் தமிழ் தேசியத்தின் மீதும் உரிமை சார்ந்த விடயங்களுடனும் ஒன்றர கலந்துள்ளனர் என்பதைதே இத்தேர்தல் முடிவுகள் கூறுகின்றது என குறிப்பிட்ட அம்பாரை மாவட்டத்தின் தமிழரசுக்கட்சியின் சார்பில் போட்டியிட்டு வெற்றி பெற்ற கவீந்திரன் கோடீஸ்வரன், எதிர்காலத்தில் உரிமை சார்ந்த விடயங்களுடன் அபிவிருத்தி தொடர்பான விடயத்தில் அதிக கவனம் செலுத்துவோம் எனவும் தெரிவித்தார்.

தேர்தல் வெற்றியின் பின்னர் இன்று (16) ஊடகங்களுக்கு கருத்து தெரிவிக்கையிலேயே அவர் இவ்வாறு கூறினார்.

தொடர்ந்தும் அவர் கருத்து தெரிவிக்கையில் இத்தேர்தலில் தமிழரசுகட்சிக்கு வாக்களித்த ஒவ்வொரு தமிழர்களுக்கும் நன்றி கூறும் அதேநேரம் வாக்களிக்காத மக்களையும் ஒன்றிணைந்து சிறந்த பலமான கட்டமைப்பை எதிர்காலத்தில் உருவாக்குவேன் என்றார்.

கிழக்கு மாகாணத்தில் 5 ஆசனங்களை எமது கட்சி பெற்றுக்கொண்டு முன்னிலை வகித்தாலும் தமிழரசுக்கட்சியை உடைப்பதற்காக மேற்கொள்ளப்பட்ட சில சதித்திட்டங்கள் காரணமாக வட மாகாணத்தில் பின்னடைவை கண்டுள்ளோம். இதனை நிவர்த்தி செய்ய எதிர்காலத்தில் நடவடிக்கை எடுப்போம்.

அத்தோடு அம்பாரை மாவட்டத்தில் கல்வி அபிவிருத்த, புதிய பிரதேச செயலகங்கள் உருவாக்கம், புதிய பிரதேச சபைகள், புதிய வலயக்கல்வி அலுவலகம், பொருளாதார அபிவிருத்தி, வளங்கள் சுரண்டப்படுவதை தடுத்தல், விவசாய மீன்பிடி கால்நடை அபிவிருத்தி உள்ளிட்ட ஏழம்ச கோரிக்கையினை முன்னிறுத்தி தமிழர்களின் இருப்பை பாதுகாக்க செயலாற்றுவோம் என்றார்.

கிடைத்துள்ள தேசிய பட்டியலை கட்சியின் முடிவுகளின் பிரகாரம் தமிழர் உரிமை பாதுகாக்கின்ற சிறந்த செயற்பாட்டு அரசியலை முன்னெடுக்கின்ற ஒருவருக்கு விரைவாக வழங்க நடவடிக்கை எடுப்போம் என்பதுடன் தமிழ்களின் இருப்பு பாதுகாக்கப்பட வேண்டும் எனும் நோக்கில் கட்சிகளுக்கு அப்பால் அனைவரும் ஒன்றிணைந்து அம்பாரை மாவட்ட தமிழ் மக்கள் வாக்களித்துள்ளனர் எனவும் கூறினார்.